Hag 2 | NdeIBE | STEP | Ngosuku lwamatshumi amabili lanye lwenyanga yesikhombisa ilizwi lafika ngoHagayi umphrofethi lisithi:

Haggai 2

Inkazimulo Eyathenjiswayo Ngendlu Entsha

1 Ngosuku lwamatshumi amabili lanye lwenyanga yesikhombisa ilizwi lafika ngoHagayi umphrofethi lisithi: 2 “Khuluma loZerubhabheli indodana kaSheyalithiyeli, umbusi wakoJuda, loJoshuwa indodana kaJehozadaki, umphristi omkhulu kanye lensalela yabantu. Babuze uthi, 3 ‘Ngubani kini owasalayo owabona indlu le enkazimulweni yayo yakuqala na? Khathesi ikhangeleka injani kini na? Kayikhangeleki njengeze na? 4 Kodwa khathesi qina wena Zerubhabheli,’ kutsho uJehova. ‘Qina wena Joshuwa ndodana kaJehozadaki, umphristi omkhulu. Qinani, lonke lina bantu belizwe,’ kutsho uJehova. ‘Lisebenze, ngoba ngilani,’ kutsho uJehova uSomandla. 5 ‘Lokhu yikho engakuvumelana lani ekuphumeni kwenu eGibhithe. UMoya wami uhlala phakathi kwenu. Lingesabi.’

6 “Nanku okutshiwo nguJehova uSomandla: ‘Ngesikhatshana nje ngizaphinda nginyikinye amazulu lomhlaba, ulwandle lelizwe elomileyo.

7 Ngizanyikinya izizwe zonke, abathandwayo kuzo zonke izizwe bazakuza, njalo indlu le ngizayigcwalisa ngenkazimulo,’ kutsho uJehova uSomandla, 8 ‘Isiliva ngesami legolide ngelami,’ kutsho uJehova uSomandla. 9 ‘Inkazimulo yale indlu yakhathesi izakuba nkulu kuleyendlu yakuqala,’ kutsho uJehova uSomandla. ‘Njalo indawo le ngizayipha ukuthula,’ kutsho uJehova uSomandla.”

Izibusiso Zabantu Abangcolisiweyo

10 Ngosuku lwamatshumi amabili lane lwenyanga yesificamunwe munye, ngomnyaka wesibili kaDariyu, ilizwi likaJehova lafika kuHagayi umphrofethi lisithi: 11 “Nanku okutshiwo nguJehova uSomandla uthi: ‘Buza abaphristi ukuthi umthetho uthini: 12 Uma umuntu ethwele inyama engcwele ngomphetho wesigqoko sakhe, umphetho lowo uthinte isinkwa loba inyama ephekiweyo, iwayini, amafutha loba okunye ukudla, kuba ngcwele na?’ ” Abaphristi baphendula bathi, “Hatshi.”

13 UHagayi wasesithi, “Uma umuntu ongcoliswe yikuthinta isidumbu ethinta okunye kwalezizinto, kuyangcola na?” “Ye,” kwaphendula abaphristi, “kuyangcola.”

14 UHagayi wasesithi, “ ‘Kunjalo-ke emehlweni ami ngabantu laba langesizwe lesi,’ kutsho uJehova. ‘Lokho abakwenzayo loba abakunikelayo lapho kungcolile.

15 “ ‘Khathesi cabangani kuhle ngalokhu kusukela ngalolusuku kusiya phambili – khumbulani ukuthi izinto zazinjani kungakabekwa elinye ilitshe phezu kwelinye ethempelini likaJehova. 16 Kwakusithi lapho umuntu efika enqunjini yezilinganiso ezingamatshumi amabili, kwakulezilitshumi kuphela. Kuthi lapho umuntu eye efatshini lewayini ukuba akhe izilinganiso ezingamatshumi amahlanu, kwakulezingamatshumi amabili kuphela. 17 Wonke umsebenzi wezandla zenu ngawutshaya ngomkhuhlane, ngesikhwekhwe langesiqhotho, kodwa kaliphendukelanga kimi,’ kutsho uJehova.

18 ‘Kusukela lamhla kusiya phambili, kusukela ngalolusuku lwamatshumi amabili lane lwenyanga yesificamunwe munye, cabangani kuhle ngosuku okwabekwa ngalo isisekelo sethempeli likaJehova. Cabangani kuhle:

19 Kuselenhlanyelo eseleyo esiphaleni na? Kuze kube khathesi, ivini lomkhiwa, iphomegranathe lesihlahla sama-oliva akukatheli izithelo. “ ‘Kusukela ngalolusuku kusiya phambili ngizalibusisa.’ ”

UZerubhabheli Lisongo Eliluphawu LukaJehova

20 Ilizwi likaJehova lafika ngokwesibili kuHagayi ngosuku lwamatshumi amabili lane lwenyanga lisithi: 21 “Tshela uZerubhabheli umbusi wakoJuda ukuthi ngizanyikinya amazulu lomhlaba. 22 Ngizagenqula izihlalo zobukhosi ngichithe amandla emibuso yezizweni. Ngizagenqula izinqola zempi labagadi bazo; amabhiza labagadi bawo bazakuwa, ngamunye ngenkemba yomfowabo.

23 “ ‘Ngalolosuku,’ kutsho uJehova uSomandla, ‘ngizakuthatha wena nceku yami Zerubhabheli ndodana kaSheyalithiyeli,’ kutsho uJehova, ‘njalo ngizakwenza ube njengesongo eliluphawu lwami, ngoba sengikukhethile,’ kutsho uJehova uSomandla.”